【Emily】公營街市檔裝八達通 免3年轉帳費

【明報專訊】去街市買餸難免會收到濕𣲷𣲷嘅銀紙，八達通卡有限公司噚日宣布，由下周一起，公營街市檔主申請商用版八達通App戶口，可獲贈八達通流動收款機，仲免去3年銀行轉帳手續費。

早前立法會討論公眾街市發展策略嘅議員議案，實政圓桌田北辰當時提出修正案，建議全港公眾街市租戶須提供兩種非接觸式付款方式，結果被否決。噚日佢喺facebook讚八達通嘅新安排，話對商戶同市民「係一個天大嘅好消息」。

3年後暫定收1%轉帳費

八達通話，豁免3年手續費結束後，暫定手續費收1%，而已經申請咗商用版八達通嘅公營街市檔主，今次都受惠。

工聯會議員郭偉强都好關心街市發展，佢噚日去西區士美非路街市同商販預祝父親節，話留意到街市以往水泄不通，但噚日「打橫行都撞唔到人」，商販大嘆生意難做，亦要面對加租。佢認為空置率超高嘅街市應及早調整策略，而受歡迎嘅街市就應做好維修保養。