【Emily】新思維晚宴籌款 暫離目標約一半

【明報專訊】新思維下月初舉辦10周年籌款晚宴，黨主席狄志遠同Emily講，「賣枱」成績與目標仍有距離，暫時籌得款項只達目標大約一半。阿狄話，以往樂意捐款嘅商界朋友，今次態度唔算積極，有人捐少咗，甚至有人「無反應」，佢估計源於經濟不景，相信與政治因素無關。

今次晚宴將筵開20席，新思維希望至少籌得30萬元，應付未來一年營運開支。對於籌款反應，阿狄話唔算理想，目前籌得目標嘅一半，佢同黨友將集中游說重點對象捐款，例如一向都有支持佢哋但暫未捐款嘅商界。

新思維前年搞籌款晚宴，並無政府官員出席，阿狄話今年暫時都未有官員應承參與，但有公營機構代表支持，多名立法會議員、區議員同泛民友好亦會現身。被問到如果最終無官員出席，係咪意味新思維年底立法會選舉難「入閘」，阿狄就認為兩者關係唔大。