【Emily】法律學生將北上實習一月 傅華伶建議睇吓內地中文

【明報專訊】約40名來自3間本地法律學院嘅學生，下周出發到內地法院實習一個月，幾個法律界資深人物喺啟動禮都有建議畀同學。港大法律學院院長傅華伶話，香港法律學生對中文、中國法律同中國社會認知相對不足，如香港多以英文讀法律，學生中文程度麻麻，建議睇吓內地中文同中文書，日後搵工都有用；又話到內地可學吓中國科技喺生活同法律嘅運用，如內地智慧法院同律師點用人工智能。

城大法律學院院長林峰話，內地法官帶完實習同學先做法官工作，時間未必好多，寄語同學多發問。佢又慨嘆，回顧廿幾年兩地對法制嘅互相理解仲未夠，形容了解得到就唔會發生2019年反修例事件。

終院林文瀚：

互動可建符一國最大利益法治系統

獲最高人民法院、教育部同中聯辦等支持嘅「內地法院實習項目」舉辦廿幾年，今次由香港與內地法律專業聯合會接手主辦。終院常任法官林文瀚話香港同內地法律制度唔同，但雙方都重視法治精神，需透過良性互動，可構建符合一國內最大利益嘅法治系統。

今年參與嘅港大法律生陳思齊話，所有同學都係來自香港法律界嘅種子，肩負聯繫內地同世界法律界橋樑使命。