【Emily】馬會請見習 可鋪路做騎師策騎員

【明報專訊】有興趣從事賽馬相關工作？就要留意香港賽馬會新一輪嘅學員招募。馬會嘅賽事見習學員培訓計劃正招聘緊，即日至7月4日可報名，學員畢業後有機會成為騎師、策騎員、釘甲匠、馬術事務助理及獸醫事務技術員等。

見習騎師學校嘅騎術教練會喺7月同8月主持策騎及體能測試，挑選具潛質嘅申請者參加體驗營，當中表現最優秀嘅25人會獲取錄加入培訓計劃，並喺新學年到廣州黃村修讀課程。賽事見習學員修讀嘅課程內容廣泛，包括騎術、馬房管理、體能訓練、運動科學、英語等，之後仲有機會去海外受訓。修讀課程期間，學員每月獲發約1.2萬元薪金，仲有免費住宿。

賽事見習學員嘅申請者須年滿15歲，最少讀完中三，唔使有策騎經驗，亦無身高限制，畢業學員將攞到等同香港學術及職業資歷評審局評核嘅第一級至第三級認可資歷。見習騎師學校舉辦賽馬培訓課程超過半世紀，畢業學員包括由騎師轉為練馬師嘅香港馬圈傳奇告東尼、冠軍練馬師姚本輝及呂健威，同埋本地騎師何澤堯等。有意加入賽馬行業嘅人可以瀏覽馬會網頁，了解更多資訊。