【Emily】軒尼詩道籃球場劃「四分線」 同菲律賓有關？

【明報專訊】鄰近灣仔集成中心嘅軒尼詩道遊樂場近月完成翻新，再度引起網民討論，原因係球場地面劃咗「四分線」區域，而籃球傳統係計3、2、1分，點解會有4分區呢？

Emily噚日去過睇，球場嘅四分線以綠、白、橙三色標示。Emily上網搵過資料，發現大半年前開始，菲律賓籃球聯賽（PBA）例行賽引入咗4分區玩法，據PBA資料，四分線劃喺距離籃框27呎外位置，只設喺弧頂區域，唔包括兩側。相對於傳統三分線，四分線距離更遠，PBA話咁可以加快比賽節奏，同時減少球隊執行區域聯防，提高賽事觀賞度。康文署噚晚回覆本報查詢話，有關籃球場主要作康樂用途，唔係用嚟正式比賽，設計中加入四分線可為使用者增加樂趣，唔會影響場地嘅實際用途。

呢個籃球場翻新，成為區內話題。早喺今年初，籃球場旁邊一幅曾被政府形容為「未能移走摩理臣山的見證」嘅麻石牆被髹上油漆，惹來網民批評當局做法同歷史保育有矛盾。

翻查灣仔區議會資料，軒尼詩道遊樂場嘅美化工程喺舊年11月初展開，原定今年首季完成。當時康文署話美化工程嘅目的係透過特色設計，加強市民嘅社區歸屬感。