【Emily】引〈再別康橋〉 再詩興大發 吟詩別友好 鄭雁雄：北京見

【明報專訊】中央政府上周五（5月30日）宣布免去中聯辦主任鄭雁雄嘅職務，至今尚未公布佢嘅去向。據Emily了解，鄭雁雄噚日向友好發送信息，引用詩人徐志摩嘅〈再別康橋〉道別：輕輕的我走了，正如我輕輕的來；我揮一揮衣袖，不帶走一片雲彩。

多名建制派噚日收到鄭雁雄嘅信息，裏面有英國劍橋大學刻咗〈再別康橋〉詩句嘅石碑相片。〈再別康橋〉係徐志摩嘅代表作之一，抒發佢對劍橋嘅不捨之情。

人代政協料會獲其他任命

早前自創廣東話打油詩嘅鄭雁雄亦展示文采，喺信息入面話「愛港情未了，履職終有期。若問何所慰，治興已端倪」。佢又感謝「各位戰友、摯友、親友」，仲話日後「北京見」。多名人代、政協同Emily講，雖然未聞鄭雁雄去向，但鄭仲有一段日子先到退休年齡，相信佢會再獲其他任命。