【Emily】律政司6．19開放日 籲年輕人報名

【明報專訊】平時形象較嚴肅嘅律政司今年再搞「律政i-Day」開放日，律政司轄下嘅「法治建設辦公室」（法建辦）社交網站話，平日有關律政司嘅報道都係告人嘅案件，「咁其實，律政司除咗告人之外，仲會做啲咩？政府律師係唔係日日都要對住啲繁瑣嘅法律條文？唔通我哋全部都係唔怕悶嘅書蟲？」帖文呼籲大學同學和年輕律師報名，6月19日去中環律政中心舉行嘅開放日就知道。

林定國下周去西安 大律師會訪意

法律界近期都有唔少活動，律政司長林定國下禮拜二會率領120人法律界代表團去西安，出席同陝西省政府合辦嘅香港法律服務論壇，論壇針對有跨境業務同想「走出去」嘅內地企業同律師同業，仲有一對一諮詢環節。

另外，大律師公會正副主席毛樂禮（Jose）同薛日華應邀去意大利米蘭，出席國際律師協會嘅律師領袖周年大會，同全球幾十個大律師公會同律師會領袖交流，Jose仲特別介紹下周五國際調解院嘅公約簽署儀式，歡迎法律業界揀香港做解決爭議嘅中立地。

律師會噚日就舉行周年大會，5名理事正式就任，兩名前會長彭韻僖同陳澤銘正式卸任，現任會長湯文龍喺特別會員通訊感謝兩人過去嘅領導同貢獻，形容佢哋對個會嘅發展同治理產生持久影響。