【Emily】返聖若瑟分享科研經驗 盧煜明籲把握黃金時代

【明報專訊】名校聖若瑟書院今年創校150周年，適逢香港科學院創立10周年，日前一齊辦科學論壇，邀請到同為聖若瑟舊生嘅中大校長兼香港科學院院長盧煜明，以及香港大學榮休副校長、國際著名岩土力學及水利專家李焯芬，與超過500名師生分享科研經驗。盧煜明話𠵱家香港科研人員擁有嘅研究經費同機會都比以前多，加上有稅務優惠等優勢，覺得香港嘅科創「好好做」，希望年輕人把握呢個科創嘅「黃金時代」。

盧煜明同李焯芬分別喺1983年同1965年於聖若瑟畢業，二人上周六喺母校分別以「為醫學診斷創造新科學範式」同「三峽大壩的過去、現在及未來」為題演講。

有學生現場提問，問AI未來點樣幫助科研同建築工程，李教授話AI可以整合大數據分析，好似預測山泥傾瀉風險等，可以輔助好多專業工作。盧教授就覺得AI會成為人類科技史上最重要發明之一，未來喺顯微鏡、X光片、手術機械人等領域都會發揮重要角色，呼籲在場年輕人積極提升呢方面嘅能力。