【Emily】啟德體育園下月嘉年華 黃金寶教玩平衡車

【明報專訊】啟德體育園主場館將陸續舉辦多項盛事，搶唔到飛嘅人唔使失望，「飛越啟德」同九龍城民政事務處下月19日同20日，會喺主場館隔籬嘅多功能活動空間「東營」，舉辦大型社區嘉年華「啟德GET SET GO！」，畀公眾預約入場參加唔同嘅體藝活動。

呢次嘉年華將有60項攤位遊戲、運動體驗同表演，市民下月11日前可以喺體育園官網免費預約入場券。部分運動體驗班、繩網體驗同大型充氣挑戰賽要收費，費用介乎10至100元，包括由港隊單車前代表黃金寶教兒童玩平衡車，同埋前香港足球先生山度士教兒童踢波等，同樣需要網上預約。

部分名額會預留喺活動當日即場派籌。「飛越啟德」話期望嘉年華可以鼓勵唔同年齡同運動水平嘅市民，透過參與體藝活動提升身心健康，同時近距離觀賞啟德主場館。