【Emily】西九家FUN藝術節 《輪居》全球首展

【明報專訊】西九文化區今個月21號起舉辦「西九家FUN藝術節」，有多項文藝及表演活動，而最矚目應該係設喺西九藝術公園海濱東草坪嘅大型戶外藝術裝置《輪居》。呢個裝置由美國藝術家Alex Schweder同Ward Shelley共同策劃，今次係全球首度展出，屆時仲會有藝術家輪流進駐，到場嘅人有機會親眼睇到唔同藝術家創作嘅過程。

今年西九家FUN藝術節邀請咗一班本地同來自世界各地嘅藝術家，帶嚟多元化嘅合家歡節目，當中唔少可以免費參加，包括由年輕粵劇演員梁非同、吳立熙帶領嘅粵劇身段工作坊，參加者可以試穿水袖學做手、執住馬鞭模擬騎馬。

如果對本地歷史有興趣，可以考慮觀賞由香港舞蹈家梁儉豐創作嘅沉浸式互動劇場《水的迴聲》。呢套劇以香港仔水上人口述歷史為靈感，糅合咗當代舞蹈、現場音樂、聲音裝置同文字。

各項活動詳情可瀏覽西九文化區網站。