【Emily】林新強做研究嘆市差 稱近半律師行一人營運

【明報專訊】經濟唔好直接影響本港律師行營運。根據法律界立法會議員林新強嘅研究，唔少喺香港同內地嘅外資律師行，一係減少律師人數，一係就直接關閉辦公室。佢形容近幾年香港法律界市場係佢入行30幾年來最差，有年輕律師更失業咗一年。

林新強委託「融入國家發展大局基金會」，舊年深入訪問16個單位，包括11間中資企業、一個經貿機構、兩間仲裁中心同兩間律師行，研究有關在港中資用本地法律服務嘅情况。綜合而言，絕大多數本地律師行嘅規模都好細，近九成唔夠5個人，近半更係一人律師行，林新強認為因為咁限制咗本地律師嘅業務拓展同品牌建設等，而以往喺香港經營嘅中資企業普遍優先選擇外資律師行，但地緣政治、外資行調整經營規模後，令市場出現真空，好多中資需要法律業務嘅範疇如航運金融同保險、企業「出海」等，喺香港係人才「真空」，本港法律服務價格亦比周邊地區高。

研究團隊建議政府牽頭成立「專業服務業發展督導委員會」等，制定相關嘅宏觀政策，修改現時會限制本地律師行擴大規模嘅條例，建立法律服務諮詢平台並編製《法律專家名冊》，同埋建立價格梯級制度等。