【Emily】《牛仔》現身昂坪360 搵「復活蛋」送禮

【明報專訊】已故漫畫家王司馬嘅《牛仔》漫畫係唔少港人嘅集體回憶。昂坪360近日搞咗個「我的牛仔時代@昂坪360」活動，仲搵埋葛民輝、林海峰、梁詠琪、利志達等9個藝人及藝術家重新演繹牛仔嘅造型，呢個月底開始喺昂坪市集展出至5月底。

小童搭纜車優惠 來回30蚊

《牛仔》原本係黑白四格漫畫，今次昂坪360用彩色呈現，喺昂坪市集嘅圓形廣場會有牛仔嘅復活節主題大型裝置；至於由9個藝人及藝術家以各自風格設計嘅牛仔新造型，將會化身成立體雕塑同平面藝術品，分佈喺市集4個地方。

適逢下月復活節，昂坪360亦推出節日限定嘅「我的牛仔」尋蛋遊戲，市民喺指定地點「打卡」就可獲得昂坪360同牛仔聯乘嘅復活節主題禮物。另外亦有本地小童纜車門票優惠，11歲或以下來回票價30蚊，等佢哋同家人一齊重拾呢套經典漫畫回憶咁話。