【Emily】故宮館擺設珍貴食具「宴客」 展多件一級文物 呈現中華飲食文化

【明報專訊】古語有云「民以食為天」，飲食喺中華傳統文化中有重要地位。如想了解中華飲食文化，不妨參觀由香港故宮文化博物館同北京故宮博物院合辦嘅「流動的盛宴——中國飲食文化」特別展，可睇到110件珍貴文物，包括唔同年代嘅食物器具、描寫各類宴會嘅畫作等。

展覽分4個單元。第一單元係「跨越生死」，展出各類祭祀及陪葬飲食器具；第二單元「跨越文化」就有多件國家一級文物，例如來自唐代嘅三彩釉陶「駱駝」，同埋宋代由白玉製成嘅「夔龍柄葵花式杯」等，分別反映當年絲綢之路發展，以及宋代流行以龍首或獸首作為杯具把手嘅文化。

展杯具獸首把手 畫中蘇軾藉美食抒懷

第三單元係「跨越山水」，展出多幅畫作，例如清乾隆年代嘅《赤壁夜遊圖》，呈現蘇軾被貶黃州後兩次同朋友遊覽赤壁時宴飲，透過美景同美食抒發胸懷嘅情景。第四單元「跨越時間」就回歸現代，參觀者可透過虛擬餐桌模擬點餐，藉觀賞唔同菜式嘅烹調過程，回顧食器嘅前世今生。

展覽今日起至6月18日喺故宮館8號展廳向公眾開放。