【Emily】七欖首設球迷村 有騷睇有兒童區

【明報專訊】國際七人欖球賽下個月28至30日首次移師啟德體育園主場館舉行，中國香港欖球總會話，買咗飛嘅球迷除咗可以睇波，仲可到訪佔地7800平方呎嘅本港首個七欖球迷村。村內設有多個餐飲攤位，包括3個花園茶座同酒吧，仲有15支本地樂隊同6名DJ演出，村內大熒幕會直播所有賽事。

由啟德體育園東面嘅多用途活動區域改造而成嘅球迷村，會喺每日比賽開始至夜晚11點開放，村內設有由「Castore」開設嘅實體店，觀眾有機會買到球迷版球衣、全新「香港七欖」系列休閒服，以及南看台系列服裝等。如果一家大細去睇波，留意欖總喺球迷村內設有兒童專區，配置巨型充氣遊玩設施，仲有面部彩繪同舞台表演。

至於演出陣容，包括曾經喺香港大球場表演過嘅Red Stripe、Helium 3，以及香港欖球界熟悉嘅DJ Ben Cullen，到時演藝人員、贊助商同賽事吉祥物亦會不時亮相，同觀眾互動。