【Emily】養和心臟導管手術 李嘉誠資助6年惠百人

【明報專訊】養和醫院心臟科中心自2018年以嚟獲李嘉誠基金會合共捐款3000萬元，透過心臟導管介入資助計劃，資助有經濟需要嘅患者做手術，避免錯失治療最佳時機，超過100個病人受惠，每人按手術種類獲資助18萬至50萬元。

計劃主要服務4類心臟病患者，包括冠狀動脈堵塞、主動脈心瓣嚴重狹窄或倒流、二尖瓣或三尖瓣閉合不全、非瓣膜性心房纖顫嘅病人。養和話有需要嘅病人可經心臟科專科醫生轉介，審批時會考慮患者病情、經濟狀况、術後預期改善效果等因素。

67歲嘅楊先生曾確診主動脈心瓣嚴重狹窄，上落樓梯都會嚴重氣喘。佢舊年1月獲資助50萬元，接受「經導管主動脈瓣置換術」，佢話𠵱家連行山郊遊都無問題，仲話如果要自行承擔手術費，可能會延遲治療，好感謝呢個計劃。