【Emily】迪士尼聘身心障礙者 「伴你同行」明可申請

【明報專訊】香港迪士尼樂園自2007年推行「迪士尼伴你同行計劃」，聘請有身心障礙嘅人工作，聽日會接受新一期申請，有超過50個職位空缺，有興趣申請可以經機構轉介到社聯或勞工處展能就業科，下月14日截止申請，5月開始返工。

迪士尼搵咗透過計劃入職嘅員工分享，其中舊年加入計劃嘅戲服助理Calvin自細就鍾意迪士尼，加入樂園前無處理服裝嘅經驗，佢話入職前接受過培訓，但最初工作時都唔可以按時完成，搞到好緊張，好彩有同事教路，𠵱家已經可以自己獨立準時完成工作。

同樣舊年入職嘅Thomas係全職娛樂事務款待專員，協助入場客人跟「迪士尼朋友」表演者見面，佢話有個常客每次都會主動同佢打招呼，又讚佢有禮貌同細心，令佢不知幾開心。