【Emily】「S」車牌1420萬成交 登十大

【明報專訊】運輸署噚日舉行農曆新年車牌拍賣，今次公開拍賣嘅車牌有49個，其中「S」同「88」最受矚目，結果兩個車牌都以破千萬元成交，成為噚日最高成交價頭兩位嘅車牌。有業界早前估計，「S」車牌成交價至少1500萬元，最終以1420萬元成交，但已晉身本港十大最貴車牌第六位（見表）。

「88」1140萬成交

「S」字頭車牌由底價5000元開始拍賣，一開始已經有買家叫價800萬元，每口叫價仲由原本1000元升到1萬元，去到第四口價嘅時候，叫價已達1000萬元，最後以1420萬元成交，成個競投過程只係大約5分鐘。

新春拍賣總成交2900萬

至於諧音「發發」嘅「88」車牌，有業界預料成交價達700萬至800萬元，最終以1140萬元成交，比起業界估計高出至少300萬元；車牌本身底價係282萬元，每口叫價1萬元，約兩分鐘後叫價已升至700萬元，每口叫價亦升至10萬元，最終以1140萬元成交。

噚日拍賣中有14個車牌未能賣出，全日拍賣成交所得款項逾2900萬元，扣除開支後會全數撥入政府獎券基金作慈善用途。