【Emily】積金局新春聚會 眾「前輩」捧場

【明報專訊】積金局噚日舉行「積金智友匯」新春聚會，主席劉麥嘉軒（右三）同一眾高層當然在場，仲有一班「前輩」出席，包括首任主席李業廣（右二）、前任主席范鴻齡、董事會前任非執董任志剛（左三）及董事會前成員馬時亨等，現場仲擺咗展板講述積金局成立25年來嘅重要事件。

劉麥嘉軒致辭時提到今年係強積金制度發展非常關鍵嘅一年，除咗係制度成立25周年，仲有多項重要改革會落實，包括5月1日起取消強積金對冲、所有強積金受託人會加入「積金易」平台，又會為強積金「全自由行」制定具體方案同做公眾諮詢等。