【Emily】港燈八成客已換智能電表 料年底裝晒

【明報專訊】網上查閱帳單愈來愈方便，港燈話2020年開始已陸續為港島同南丫島嘅所有用戶更換智能電表，𠵱家已為約八成客戶接駁超過48萬個智能電表，預計今年底完成。有咗智能電表，住宅同公司客戶用港燈手機App，就可以睇到處所每日或每半小時嘅用電量，一方面畀大家預測帳單電費、調節用電，另一方面，透過智能電表回傳嘅系統數據，港燈亦可以更清晰咁掌握電網狀况，提升電網管理同營運效率。

港燈話安裝咗智能電表嘅客戶都會收到通知下載港燈App，再登記「網上通」服務，就可以查閱用電資訊，𠵱家已經有超過10萬個用戶下載咗。客戶施小姐話，App嘅用電量提示功能好實用，可以預設用電量提示，當達到上次帳單嘅預設百分比，就自動會有信息提醒，幫手節省開支。