【Emily】梁美芬倡發展項目發債 舉例花墟重建

【明報專訊】財政司長陳茂波預告《財政預算案》會以「節流」為主，經民聯立法會議員梁美芬噚日同傳媒茶敘時，提到政府可以考慮再發債，甚至以指定項目做主題，舉例市建局嘅花墟重建項目位置優越，相信類似發展項目一定吸引到人認購，而對象唔限於發展商或基金公司等，市民都可以認購，同時增加市民對香港發展項目嘅投入感。

至於政府財赤問題，梁美芬以一間大學院校為例，話涉及研發嘅部分唔可以削減資源，反而應該更大力投資，但各個部門就要自己諗點樣可以減少開支。佢又以近月社會熱議嘅「兩蚊車」為例，提及當年包括佢在內嘅多個黨派係想為中產爭取粒「糖」，所以將門檻降至60歲，如果𠵱家取消，好影響呢班人出街嘅意欲，但就贊成增設限制，減輕政府財政負擔。