【Emily】梅彥昌組城大披頭四唱Let It Be 改圖Abbey Road封面 大派簽名相

【明報專訊】近日各大學先後搞傳媒春茗，分享院校最新發展。噚日城大校長梅彥昌喺春茗尾聲，同校方高層組成「城大披頭四（CITYUHK BEATLES）」，拎住結他自彈自唱「披頭四」名曲Let It Be及Hey Jude，又以英文名曲Stand By Me作結，寓意「與香港同行」。

唱Stand By Me 寓意與港同行

梅彥昌噚日同城大校董會秘書唐寧、校長室高級總監李惠光、特約教授陳金轉組成「城大披頭四」，出場前已換走恤衫，改著樽領白衣，連續高歌3曲，現場氣氛高漲。

校方喺表演中途，更加向在場傳媒派簽名相，張相係披頭四樂隊名作Abbey Road唱片封面嘅「二次創作」，樂隊成員個樣被「改圖」為「城大披頭四」4人，佢哋亦有逐張親筆簽名。其中有女粉絲一手拎咗幾張簽名相留念，原來佢係梅教授太太，佢同Emily分享，話梅教授表演前一日先開始練歌及結他，又話自己最愛老公唱披頭四嘅Yesterday。

李惠光同Emily傾開，本身無打算唱Stand By Me，亦係「出騷」前一日臨時決定，話希望帶出信息，寓意喺呢個環境「與香港同行」。