【Emily】港產數學家研究 助測亞馬遜雨林非法採礦

【明報專訊】嶺南大學研究生院噚日舉辦「卓越研究的個人之旅」講座系列，邀請咗嶺大學術暨教務副校長及林文贊科學計算講座教授陳漢夫主講「計算數學家的研究之道」，吸引約100名師生參與。

陳漢夫教授係香港土生土長嘅世界頂尖數學家，美國史丹福大學2019年起公布「全球首2%頂尖科學家」，佢一直榜上有名，佢喺講座上分享自己喺一個廣為引用嘅著名研究「解構Toeplitz矩陣系統的最快方法」，大大加快咗處理圖片雜訊嘅效率，技術已成功應用喺太空同醫學影像領域。

陳教授話，近年佢同歐洲嘅研究團隊開發出新算法，可以協助歐洲南方天文台望遠鏡，喺拍攝遙遠同暗弱星體時可以保持高清晰度。佢並同美國研究團隊合作，開發新嘅演算法嚟監測土地表面嘅變化，協助偵測秘魯亞馬遜雨林中非法採礦活動。陳教授引用愛迪生名言「天才是百分之一的靈感加上百分之九十九的汗水」，勉勵年輕學者「成功須苦幹」。