【Emily】朋友帶「熊貓」探班 陳克勤一嘗飼養員滋味

【明報專訊】「PANDA GO！香港遊」活動早前巡迴本港多區，展出過千隻大熊貓雕塑，仲推出「我要做飼養員」計劃，市民只要捐款就可以將熊貓雕塑帶返屋企。一向熱愛動物嘅民建聯主席陳克勤噚日喺facebook分享同其中一隻熊貓雕塑喺立法會嘅合照，莫非佢都搶到認捐名額？原來係佢嘅朋友成功認捐獲得熊貓雕塑，專登帶埋雕塑去立法會探佢，等佢一嘗做「飼養員」嘅滋味。陳克勤仲趁機幫「PANDA GO！香港遊」宣傳，話本月中會喺荃灣「D‧PARK」同中環街市舉行新春熊貓雕塑展覽，叫市民唔好錯過打卡機會。