【明報專訊】政府近月不時動員公務員為明年揭幕嘅啟德體育園做壓力測試，其中體育園啟德青年運動場聽日（17日）會舉行代號「慧光」嘅跨部門反恐演習。今次演習由跨部門反恐專責組負責，旨在增強跨部門反恐專責組同各部門喺處理反恐情報同應對恐襲事件嘅應變能力，並提高公眾對反恐工作嘅認知。
警方會喺演習前見傳媒，簡介演習目的同詳情。警方口頭答覆Emily話，今次係由警務處嘅「演練專責組」統籌，共有8個政府部門參與。
另外，啟德體育園明年會承辦第15屆全國運動會部分競賽項目。民眾安全服務隊話，每個周末都會派出超過100人到體育園參與唔同演練，以及負責測試賽嘅人群管理。
