【Emily】消防加碼搵大隻佬騷肌拍月曆

【明報專訊】消防處今年繼續把握「肌」會，邀請健碩消防員拍攝月曆。相比舊年月曆只得兩個消防員赤裸上身喺「火場前」騷肌，今年加碼搵咗4個赤膊上陣，推廣工作同介紹裝備。今年月曆以「救災扶危，為民解困」為題，照片取材自處方3個職系，即消防、救護、調派及通訊課人員嘅日常工作。

其中1月份消防員手持嘅呼吸器，係用嚟保護佩戴者呼吸氣道免受濃煙同有害物質等危害；3月份消防員手持長脊椎板，用嚟承托懷疑脊椎受傷者；7月份消防員就手持「可馬陶快速爆破器」，係配合萬能剪機或積躉做切割同爆破等工作。雙數月份就展示快速截擊車同流動指揮車等執勤車輛。

消防處形容各職系人員喺滅火、救護服務同調配資源方面各司其職，守護市民生命安全。市民稍後可以喺處方官網下載月曆。