【Emily】警犬隊75周年 邀劉偉恒拍微電影《毛敵拍檔》

【明報專訊】隸屬警方「重點及搜查組」嘅警犬隊目前有逾200隻警犬，主要負責巡邏、搜索爆炸品同毒品，作追蹤同氣味鑑別。因應警犬隊成立75周年，警方邀請咗導演劉偉恒製作微電影《毛敵拍檔》，並由藝人陳豪友情客串。

總部周日搞首映嘉年華

警犬隊總督察范展婷話，期望藉此增加市民對警犬隊嘅認知，佢舉例警方多數喺凌晨圍封某範圍，畀爆炸品搜索犬做防禦性嘅安保工作，免影響市民正常生活。

警方下周日（17日）會喺位於文錦渡嘅警犬隊總部舉行微電影首映嘉年華，呢套微電影其後會喺本地部分電視台同警方社交平台播放。

嘉年華會設展覽同攤位遊戲等，亦會安排首隻成功喺本地訓練嘅氣味鑑別犬首次公開示範。

嘉年華門券已交由各警區警民關係組派發。重點及搜查組警司高仲英話期望今次慶祝活動做到「入屋」，並將會安排警犬隊到保良局、兒童醫院或其他團體探訪，令警犬隊成為執法同關懷兼備嘅隊伍。