【Emily】搞九東發展研討會 鄧家彪送AR麻將

【明報專訊】政界不時搞研討會或講座集思廣益，工聯會議員鄧家彪（Bill）喺禮拜日（10日）將舉辦「九龍東可持續高質量發展研討會」，而佢就搞搞新意思，為來賓送上睇得又「打得」嘅禮物推介九東，原來係一隻刻有「東九」嘅麻將牌。

唔好睇小「麻雀雖小」，Bill同Emily示範，原來結合擴增實境（AR），影一影隻牌後，「東九」二字會「浮現」，展示九東內嘅景點同圖像。

倡推動「東九對東盟」

Bill話，揀AR麻將係因為想比較貼地咁推廣東九龍作為第二核心商業區（CBD 2）嘅定位同產業發展，佢又拋磚引玉話，可以試吓推動「東九對東盟」，鼓勵東盟商會公司落戶九東，以後諗起東盟就去九東。

講番呢個研討會，有發展局長甯漢豪、副文體旅局長劉震、議員陳沛良、起動九龍東專員靳嘉燕、科大創業中心總監凌恒然等，講者都可湊夠兩枱麻將。