【Emily】世界中風日 招學生大使教「談笑用兵」辨徵兆

【明報專訊】噚日係「世界中風關注日」，香港中風學會同香港電車嘅姊妹公司「叮叮科創」合作搞咗個「擊退中風」學生大使計劃，一連4日向全港中學招募20個學生大使，資助佢哋學習AI技術同提高健康意識，等佢哋可幫手宣傳，提升大眾對中風嘅關注。

喺呢次計劃，學生大使會參觀復康中心，同埋參加工作坊去深入了解中風，仲可以獲全額資助，學習用AI嘅技術結合創意去製作吉祥物同宣傳片，宣傳預防中風嘅「談笑用兵」口訣。一班學生大使喺完成課程後會獲頒證書，同埋以「擊退中風」嘅大使身分喺校園或社區做推廣。

「談笑用兵」口訣係用嚟判斷有冇中風先兆，當中「談」係指表達或說話時有困難同𦧲脷，「笑」係解面部表情唔對稱，「用」就係手腳冇力，如果出現上述情况，就要班救「兵」求醫喇！