【Emily】藝術治療助少數族裔除語言障礙

【明報專訊】近62萬名少數族裔喺香港生活，面對言語障礙同文化差異等挑戰，但社會欠缺針對佢哋嘅情緒支援服務。香港表達藝術治療服務中心舊年10月起推出「藝術生命軌跡 多元種族活齡社區計劃」，為少數族裔長者同照顧者提供表達藝術治療情緒支援同生死教育，希望改善佢哋嘅精神健康，減輕面對死亡嘅焦慮，藉此建立共融社區。

計劃由領展「愛．匯聚計劃」資助，服務逾300人，包括尼泊爾、巴基斯坦、印度及華裔長者同照顧者。72歲尼泊爾裔長者Ash Maya Limbu於10年前跟家人移居香港，由於唔識廣東話同英語，欠缺自信，當搭公共交通工具或者求醫都會因言語不通而特別緊張。佢5月經社福機構元朗大會堂參加由香港表達藝術治療服務中心舉辦嘅6星期工作坊，自覺想法變得更正面，更能融入社區。

中心服務總監李慧莊話，少數族裔尤其女性有好大家庭責任，平時無從釋放情緒同壓力，透過藝術創作可打破語言障礙，紓發情緒。中心同中大心理學系研究參加者喺參加活動前後嘅變化，發現少數族裔長者喺家庭管理、社交活動、興趣同家庭關係方面，受困擾程度減少平均三至四成。