【Emily】「紫金山」彗星耀夜空 拍攝有貼士

【明報專訊】彗星「紫金山──阿特拉斯」（Comet Tsuchinshan-ATLAS，彗星編號C/2023 A3）近日喺香港夜空出現，本報記者噚晚6點45分開始，從馬灣向機場方向拍攝，等到太陽完全落山，就喺彗星於金星附近，拍攝到其劃過香港夜空嘅一刻（上圖，下圖箭嘴示），記錄到呢個據說8萬年一遇嘅情景。根據香港太空館喺facebook話，未來幾日黃昏6點40分左右，喺西邊開揚地方都有機會見到。

Emily即刻請教同事點樣拍攝到，原來肉眼幾乎睇唔到粒彗星，但舉起任何電子拍攝裝備對準方向，包括手機，都清晰可見，至於同事就預先用星像應用程式搵啱位置，擺好腳架、校啱角度，等到天黑晒，用3至6秒嘅快門拍攝，都見到粒星好清楚，如果快門校慢啲，粒星就會有條「尾巴」。