Emily Online｜藝文界舉辦「區區有戲睇」　免費派戲票與民共賞鄧小平傳記等電影 (21:09)

國慶剛剛過咗一星期，不過慶祝活動陸續有來。香港文化藝術界國慶籌委會同香港戲院商會等本月起喺全港18區，舉行橫跨整個10月嘅「區區有戲睇」，送出約2500張戲票，期望豐富市民、學生同青年嘅文化生活，並增強佢哋認識祖國歷史文化，建立家國情懷及國民身份認同。

活動今日（8日）喺太古廣場百老匯戲院舉行啟動禮，首炮上映嘅喺傳記電影《鄧小平小道》。睇番資料，套電影由內地導演雷獻禾拍攝，2021年喺江西省首映，作為中共建黨100周年嘅獻禮片。大會話，喺國慶75周年及已故國家領導人鄧小平誕辰120周年之際，市民可透過電影學習鄧小平與人民同甘共苦嘅崇高品質、深厚博大嘅愛國情懷及剛毅堅韌嘅品格，形容「意義重大」。

另外兩套電影則係今年上映嘅內地劇情片《解密》，及近月喺港上映嘅內地喜劇片《抓娃娃》。大會將於18區不同戲院舉行放映活動，並邀請唔同團體及唔同地區市民欣賞。