【Emily】浸大寫作坊 邀《少年Pi》作者講創意

【明報專訊】試想像，你啱啱經歷完一場海難，同屋企人失散，船上得番你同隻老虎，仲要同佢漂流200幾日……《少年Pi的奇幻漂流》嘅故事，如果發生喺現實世界，唔少人都會難以置信，但正正係故事嘅呢種虛幻令讀者着迷，亦係文學創作引人入勝嘅地方。浸大「國際作家工作坊」邀請咗布克獎得主兼《少年Pi》嘅作者楊．馬泰爾（Yann Martel，圖）一連兩日出席活動，同公眾交流，啟發文學創意。

第一場活動係10月21日喺浸大舉行嘅「朗誦及對談」，屆時馬泰爾會朗誦佢嘅著作，同出席者討論，交換創意。緊接喺10月22日，馬泰爾會出席浸大同學限定嘅寫作大師班，分享創作心得。不過活動名額有限，公布唔夠一星期已經爆滿！