【Emily】紋身展開鑼 同場加映骷髏面具塗裝賞

【明報專訊】紋身界年度盛事「香港中國國際紋身展」噚日喺灣仔會展舉行，今日同聽日會有紋身比賽，活動聽日結束。今次大會邀請到內地、日、台、泰、匈、法、英等地紋身師參展，互相交流紋身文化，亦因為難得有咁多海外紋身師在場，唔少參加者都會趁機即場紋身。

展覽除一如以往有紋身比賽，畀紋身師喺舞台上較量，仲會有由藝術機構6vi發起嘅「三‧不」全球跨界藝術家塗裝改裝大賞，大會話呢個活動上年深受各界歡迎，今年再邀請各地唔同領域嘅藝術家，創作超過400個骷髏頭面具，其中20幾人更會到現場講解創作歷程。

「國際藝術家紋身主題海報展」同時喺展覽舉行，大會話呢個活動籌備咗兩年，由近千名3歲至90歲嘅藝術家同藝術愛好者一齊創作。展覽1日門票200元、3日門票300元，可以上網或現場買飛入場。