【Emily】陳恒鑌倡荃灣推寺廟住宿 仿日本靜修

【明報專訊】國務院港澳辦主任夏寶龍提出「香港無處不旅遊」理念，各界紛紛獻計。民建聯議員陳恒鑌同顏汶羽噚日提出荃灣葵青區同鯉魚門嘅旅遊發展建議書。陳恒鑌提出仿效日本喺荃灣推出寺廟住宿，畀市民同遊客去靜修，認為有寺廟住宿、靜修為主題嘅酒店，可以為本港旅遊添加新動力。

陳恒鑌話，廟宇旅遊近年喺內地大受歡迎，但本港好多寺廟因牌照關係，齋菜、紀念品都唔可以賣，希望政府放寬限制，為本港增添旅遊元素。

佢又話，荃灣德華公園內嘅法定古蹟同歷史建築，目前係丟空狀態，建議政府出租畀年輕人或團體，經營文藝書店、咖啡室等。至於法定古蹟三棟屋博物館，陳恒鑌覺得只可參觀太浪費，建議除增加購物紀念品嘅部分，亦可現場製造具特色嘅飾物做手信。

顏汶羽提議鯉魚門搞閒釣

顏汶羽就提議喺鯉魚門發展休閒漁農業等，例如建立釣魚走廊，發展「閒釣」旅遊，並設立行山徑，畀旅客經山路去鯉魚門，同時喺避風塘提供腳踏船遊覽，畀市民喺另一角度睇風景。