【Emily】兩律師會赴英法律年度開啟禮 杜淦堃：推廣港司法制度優勢

【明報專訊】英國當地時間10月1日舉行法律年度開啟典禮，香港大律師公會同律師會按慣例繼續獲邀出席，同全球37個地區法律界同行聚首一堂。

馬曼婷感謝湯文龍遠道出席

儀式按幾百年慣例喺西敏寺舉行，一眾法官、當地大律師同嘉賓喺儀式後，由西敏寺行去國會所在嘅西敏宮，出席大選後上任嘅司法大臣馬曼婷（Shabana Mahmood）做東嘅輕量自助早餐聚會。傳統上出席儀式之前要節食，時移世易當然無咗呢個做法，但保留司法大臣請來賓食「早餐」嘅安排，只係時間延後至中午。

律師會會長湯文龍（Roden）同馬曼婷有個非正式對話，律師會引述馬曼婷感謝Roden遠道從香港而來出席典禮，又話二人都係第一次以現時嘅身分參加典禮。大律師公會主席杜淦堃（Victor）連續第三年以主席身分去倫敦出席儀式，今年仲有副主席毛樂禮（Jose）一齊去。Victor話，喺國際上同其他法律界代表保持直接溝通好重要，已經把握機會向外推廣香港司法制度獨立及優勢，又如實反映香港社會狀况。

今年全球大選年，Roden同Jose分別話，法律團體保持政治中立好緊要。