【Emily】城巴氫巴首過海 千人免費遊車河

【明報專訊】城巴嘅雙層氫能巴士噚日起試行來往堅尼地城及觀塘嘅101號過海線，為期約一個月。城巴噚日亦舉辦新能源巴士免費體驗日，以氫能及電能巴士行駛101號線，免費載客。大批巴士迷好開心可以免費「遊車河」，城巴話噚日所有免費班次都爆滿開出，有近千人參與。

城巴氫能巴士今年2月起已經喺九龍區20號窩打老道線、22M號啟德線同20A號彌敦道線試行載客半年，城巴話收集咗氫巴喺炎熱同寒冷天氣下嘅全天候營運表現，今次安排氫巴駛改行101號線，主要想測試行長途過海線嘅表現。