【Emily】港鐵通車45周年 「站見」展加3展品

【明報專訊】噚日除咗係國慶，仲係港鐵通車45周年，港鐵為咗慶祝，噚日喺紅磡站嘅「站見」鐵路展加咗3件新展品，包括俗稱「波鐘」嘅路牌閉塞控制器、第一代車務運作模擬系統，同埋相信會係最受鐵路迷關注嘅標誌性紅白色設計列車車頭。

新加紅白車頭受鐵路迷關注

「站見」鐵路展要事先網上預約登記先可以入場，展覽自4月底開放，周末場次經常爆滿。港鐵回覆Emily話，噚日起展覽已實施新安排，每日場次由5加到6，每場參觀人數大約100。港鐵話今年7月起已加開平日場次，並接受慈善團體同學校團體預約，其他市民如果想預約，周六周日同假日場次就的確比較受歡迎，但平日場次就通常都有餘額。

至於展覽維持到幾時，港鐵重申早前已宣布由原定今年底結束延長至下年，會密切留意展覽運作情况。

另外，鐵路展噚日亦迎來第45,000名參觀者，呢位幸運兒係5歲小朋友，港鐵特登送上紀念品，多謝佢嘅支持。