【Emily】新西蘭實習生分享港魅力：有家嘅感覺

【明報專訊】香港喺新冠疫情後力爭外地遊客來港，有新西蘭學生喺香港實習兩個幾月後撰文寫感受，大讚香港有魅力，無論本身鍾意乜嘢都可以喺呢度搵到，期待盡快再次來港。

享受灣仔海旁行去中環返工

法律學生Sian Vaughan-Jones獲亞洲紐西蘭基金會贊助，喺香港實習兩個幾月，包括喺香港國際仲裁中心實習，佢大讚香港係區內領先嘅仲裁中心。Sian拍片同寫文分享平日喺香港一日點過，例如佢好享受沿灣仔海旁行返中環國金寫字樓，沿途感受大城小景，中午探索中環唔同餐廳，收工後去跳芭蕾舞。

佢又分享話，喺香港成日睇戲，睇咗《重慶森林》、《但願人長久》、《九龍城寨之圍城》等港產片，去咗重慶大廈等重溫戲中場景，又乘着地理優勢，去咗澳門同東京旅行。Sian話，可以成日周圍探索香港、感受香港魅力，令自己有家嘅感覺。