【Emily】ifva短片賽暫停辦 「調整未來方向」 已辦29年 曾有涉社運場面作品撤放映

【明報專訊】香港藝術中心主辦嘅ifva獨立短片及影像媒體比賽不經不覺舉辦咗29年，向來被視為本地電影人搖籃。Emily聽聞，ifva噚日突然向支持者發電郵，宣布今屆比賽會暫時停辦（take a brief hiatus），短時間內會公布消息。ifva話今次嘅暫停可以令佢哋重新審視同調整未來方向，確保喺不斷變化嘅媒體生態中保持領先地位。

將成立特別研究小組

ifva仲話，今次嘅決定源於近年短片發展、媒介藝術嘅持續影響，同埋社交平台崛起，會成立特別小組研究ifva發展方向。

始於1995年嘅ifva，係香港歷史最悠久嘅獨立短片同影像媒體比賽，唔少本地新進導演曾經憑短片奪獎並嶄露頭角，例如《一念無明》導演黃進、《年少日記》導演卓亦謙。

歷年唔少參賽作品透過影像回應時代，第29屆比賽就由何思蔚執導、以移民潮為題材嘅《直到我看見彼岸》奪得公開組金獎。第28屆獨立短片及影像媒體節曾有兩套參賽作品因未符合電影、報刊及物品管理辦事處放映要求，喺未能放映完整版本下，導演決定取消放映，包括有社運場面嘅《失去的部分》，同埋有戴黃頭盔人物畫面嘅《城堡裡的大象》。