【Emily】福建附小15周年校慶電影 勾起「我們的成長路」

【明報專訊】福建中學附屬學校踏入15周年，校方製作校慶電影《我們的成長路》，日前喺銅鑼灣影藝戲院舉行福建中學及香港菁英會專場，兩間學校共250多個學生及家長免費睇戲及出席分享會。

菁英會主席林智彬話電影涵蓋育兒教育理念，提及教師點樣包容學生不足，幫助學生反思後改過，放映期間觀眾席仲傳嚟拆紙巾包裝嘅「沙沙聲」，相信引起觀眾與劇中人物共鳴，勾起每個人嘅成長歷程，做到「一同經歷悲歡離合，淚水與歡笑交織」。

福建中學附屬學校校長徐區懿華有份寫劇本，同時有幕前演出，飾演校工。校方期望有關安排能體現無論係校長或校工，佢哋根本職責都係致力於學生教育同成長。校方將喺下月26日及12月14日兩個周六舉辦公眾放映，即日起可網上報名，門票50元，籌得款項扣除必要開支後，會用作校方生命教育項目、翻新小劇場及其他改善學習設施工程。