【Emily】體育界賀國慶 霍家三父子同台

【明報專訊】社會各界陸續舉辦賀國慶活動，體育界噚日就喺金鐘一間酒店舉辦酒會，可謂星光熠熠，體育界領導層幾乎到齊，包括霍家父子兵聚首禮台。特首李家超致辭時話，下年揭幕嘅啟德體育園係香港歷來最大嘅體育基建項目，有優越場地舉辦世界級賽事，推動體育發展及各類盛事，呼籲體育界繼續同政府合作，為香港體育持續發展貢獻。

出席酒會嘅官員除咗李家超，仲有中聯辦副主任何靖、外交部駐港公署副特派員李永勝、文體旅局長楊潤雄。另外，酒會籌備委員會主席霍震霆同副主席兼秘書長霍啟剛、足總主席霍啟山、體院主席鄧竟成同院長蔡玉坤、劍總會長伍海山等體育界人士都有出席。

霍啟剛致辭時話，為慶祝國慶75周年，中國香港體育聯盟會走入社區舉辦唔同活動，包括體育界國慶中秋正能量暖社群活動、「敢動藝術3 」油麻地國慶社區壁畫、與運動員同賀國慶中華傳統手作班、北部都會區國慶古蹟跑等。