【Emily】體育園八成舖租出 擬聖誕前開

【明報專訊】啟德體育園工程如火如荼，趕喺年底做測試賽。立法會鞏固及促進九龍東第二核心商業區嘅相關政策事宜小組委員會成員噚日就去咗參觀，小組主席鄧家彪話見到主場館已鋪滿座椅，亦裝咗音響，見到場館內有大型LED屏幕等設備，形容「似模似樣」。佢又代體育園公布園區有八成商舖已租出，計劃喺12月聖誕檔期前開業。

多個去參觀嘅議員都關注5萬人主場館嘅人流管理及交通。民建聯顏汶羽話，單靠屯馬線鐵路唔夠，巴士、小巴甚或渡輪都應該喺疏導計劃之內。鄧家彪話獲告知場館有3個主要通道，當局會考慮喺演出日子增設特定巴士專線接載觀眾。

議員話交通唔夠 港鐵：會配合

港鐵就同Emily講，一直同相關部門及啟德體育園保持緊密溝通，會全力配合，就體育園將來舉辦嘅唔同類型活動對服務同車站各類人流安排需求，會作相應安排配合。

議員陳沛良就話，明年第15屆全運會部分項目會喺體育園舉行，場館亦將有國際巨星開演唱會，體育園對香港文體旅發展發揮重要作用。