【Emily】醫輔隊制服白變綠 透氣度增抗炎夏

【明報專訊】本港酷熱天氣愈嚟愈頻密，醫療輔助隊今個月起陸續換新制服，預計第四季全面更換。新制服同以前白色棉質恤衫制服唔同，隊方話新嘅綠色Hybrid-Tee，前方用紮實而唔易透底嘅物料，令工作服較挺身，後方則用速乾透氣防霉物料，提高背部散熱能力，令人員當值或急救時更舒適方便。白色制服則改為典禮等正式場合先會著。

醫療輔助隊噚日喺facebook專頁形容「換個新形象舒適又醒神」，又透露稍後會以布名牌取代膠名牌，並研究引入新款工作服套肩章。冬季就快嚟到，醫療輔助隊人員可以喺新嘅綠色制服上加添風褸保暖。據Emily了解，醫療輔助隊正研究冬季嘅新制服，屆時會採用更防水同保暖嘅物料，預計最快明年下半年面世。