【Emily】贈港大熊貓後日到埗 陳國基接機 四川聽日歡送 楊潤雄去接收

【明報專訊】唔少人期待已久，由中央送贈嘅一對大熊貓預料後日（26日）由四川坐飛機來港，然後去海洋公園嘅新屋企安頓。港府及四川當局計劃聽日喺四川舉行歡送大熊貓儀式，文化體育及旅遊局長楊潤雄會到當地接收，一對國寶周四會坐專用貨機來港，港府會喺機場舉行歡迎儀式，預料政務司長陳國基會去接機。

特首李家超早前已預告，一對來港嘅國寶約5至8歲，雄性大熊貓體重120多公斤，形容佢動作敏捷、聰明好動；而雌性大熊貓體重約100公斤，溫柔可愛、性情溫馴。不過，佢哋來港後需要成個月隔離檢疫，之後都要時間適應，當局預計可能要到12月先能夠同大家見面。李家超早排都話要視乎一對大熊貓嘅狀態、健康或者適應情况，再按專家意見，決定同大家見面嘅日期。

先檢疫一月 海園派員赴川備竹葉

據now新聞台報道，海洋公園已派員去咗四川，準備大熊貓來港嘅食物，又話海洋公園𠵱家餵畀大熊貓食嘅竹葉，都係由廣州從化運嚟，而園方派員去四川都江堰基地整理竹葉，等新來港嘅大熊貓可以食番四川風味。