【Emily】九巴推遊九龍HK1線 55元全日任搭

【明報專訊】仲有個多禮拜就到十一黃金周，九巴今日起推出九龍旅遊路線「HK1」，以循環線形式行駛，由尖沙嘴碼頭出發，途經各個九龍景點，包括內地客打卡熱點廟街、舊油麻地警署、旺角女人街等，其他車站包括西九文化區、黃大仙祠及九龍城等，全程17個站，收費19元，旅客亦可買55元嘅「旅客日票」，一日內無限次搭HK1。

九巴話，呢條路線嘅巴士車廂特別安排3種語言廣播，沿途會用普通話、英文同廣東話介紹景點，而且會有免費無線上網同USB叉電位。另外巴士不設企位，九巴話係為咗旅客可以更舒適咁享受旅程。

想試搭HK1巴士嘅市民同旅客可以認住車身以粉紅色做主調，印有「遊．九龍Tour@Kowloon」字眼，逢周一至周五朝10晚6服務，每30分鐘一班；周六周日同公眾假期就延長服務至夜晚8點，同樣係30分鐘一班。