【Emily】醫局發國情問卷迎國慶 員工全中有獎

【明報專訊】政府舉辦唔少國慶活動，與民同樂之餘，亦加入弘揚愛國主義教育元素，政府部門同公營機構都積極參與。Emily得知醫管局（HA）向員工發出一份「認識國家迎國慶」問卷，一共有7條選擇題，包括國徽同國旗有邊啲元素、國歌係邊齣電影嘅主題曲、「一帶一路」至今有幾多國家參與等。HA話7條問題全部答中就有機會攞到Godiva朱古力或Haagen-Dazs雪糕價值50蚊嘅禮品券。

問卷主題係「傳承中華文化 共享佳節喜慶」。HA同員工講，今年係中華人民共和國成立75周年，別具意義，希望員工一齊增進對國家嘅了解，仲叫員工答完後緊記參考相關問題嘅解釋。

Emily都算熟悉國情，睇過嗰7條題目，發現一啲都唔易答，涵蓋中國嘅交通發展、外交、行政區等，例如第二題係問邊一種係正確嘅天安門廣場升降國旗儀式，第三題係關於直轄市，第六題係揀出最接近2023年國家鐵路載客人次嘅選項，最後一題係問中共第二十屆三中全會提出嘅7個「聚焦」唔包括邊一項。