【Emily】浸大藝術科技孵化中心揭幕

【明報專訊】近年政府積極推展文化藝術產業發展，浸會大學斥資約3000萬元創立「CHRYSALIS藝術科技孵化中心」，協助文藝初創企業將理念轉化成產品，暫有7間公司進駐。中心噚日揭幕，浸大暫任首席創新總監劉樂庭話，校方會向進駐公司提供設施等支援，對方需交租或轉讓股權，期望公司喺一兩年內「建立唔同嘅合作、拎到唔同嘅資源」，順利「畢業」。

中心位於石硤尾賽馬會創意藝術中心，佔地約4000平方呎，內設穹幕影院、電子機械工作間、混音工作室等，畀進駐嘅初企使用，目標對象係浸大教職員、學生嘅文藝公司。浸大創新、轉化及政策研究院技術轉化助理總監（創業）陳銳文話，正跟唔同企業傾緊，相信進駐企業數量短時間內可翻倍。

陳銳文又話，初創公司喺創立前期都要經歷「死亡谷（Valley of Death）」時期，例如資金鏈斷裂、股東爭拗等，加上文藝企業嘅回報唔似其他產業咁直接，「死亡谷」階段特別長。佢期望浸大可充當「一個齒輪、一個潤滑劑」，令到呢啲初企「唔好死」，「唔死就仲有機會」。