【Emily】宏信書院建航天教育實驗室 每周設兩節課

【明報專訊】今個新學年，位於元朗嘅基督教香港信義會宏信書院將加強航天科技教育，包括同中國宇航學會合作，10月下旬喺校園建成全港首間航天教育實驗室Space Hub；亦會喺小四到中三級引入航天課程，每個循環周有兩節獨立課堂，建立完整嘅航天課程大綱。

校長林克忠話，學生喺Space Hub可以分析人造衛星運行數據，亦可以同人造衛星溝通，期望有關設施將來可開放畀全港學生使用。林校長又相信，只要有合適土壤同培訓，香港學生絕對有能力參與到國家航天事業。林克忠話，學生透過新增嘅航天課程可以有系統學習製作人造衛星、火箭嘅技術，設計載荷同太空城市等知識，而學校已經請咗兩名具專業物理同化學航天知識嘅教學人員。

學生訪青海實驗室 「製火箭」挑戰賽排第二

另外，宏信學生7月獲邀去青海省茫崖市冷湖鎮參加由冷湖實驗室舉辦嘅冷湖火箭排行榜「U18 全球青少年火箭發射挑戰賽」，係本港首間獲邀比賽嘅學校，同全國20多所學校嘅同學「較量」，中學團隊憑自製火箭獲不俗成績，總分排第二。