【Emily】外國領館慶中秋 歐盟辦主任品月餅 探老友記 英副總領事扮知客推車送點心

【明報專訊】中秋佳節，幾個外國駐港總領事館都喺社交網站慶祝，或向港人送上節日祝福。英國駐港澳總領事館去咗探老人家兼飲茶，副總領事樂秀惠（Sarah Robinson）同同事一齊變身知客、廚師同侍應，推住懷舊點心車，仲一齊合唱1980年代名曲𠻹！

老友記當中，有部分患咗失智症，部分仲有唔同程度嘅吞嚥困難，英國駐港澳總領事館喺社企Project Futurus幫手下，準備咗燒賣、蝦餃、腸粉等點心嘅軟餐，等老友記都可以品嘗一盅兩件嘅滋味。

啱啱嚟香港嘅歐盟駐港澳辦事處新主任盧效偉（Harvey Rouse）就搞咗個月餅試食會，第一次喺香港過中秋嘅佢一次過試勻雙黃白蓮蓉、五仁月餅、冰皮月餅、流沙奶黃月餅，佢話最鍾意流沙奶黃月餅，連番用廣東話話「好好味」。鍾意踩單車嘅佢話，五仁月餅有好多果仁，如果踩上山頂要蛋白質同能量就啱晒喇！

盧效偉話中秋係同親友團聚嘅日子，祝大家中秋節快樂，又特別向未能同至親共度佳節嘅人送上祝福。