【Emily】詐騙案同升 星港警察齊拍防騙片

【明報專訊】香港同新加坡近年發生嘅詐騙案持續上升，兩地警方早前合作製作防騙短片，並上傳社交平台向市民宣傳防騙信息，涵蓋4類騙案題材，包括網絡愛情、假冒官員騙案等，內容取材自真實案例。短片自今年5月30日陸續上傳到facebook同Instagram，截至上個月4段短片觀看人次超過27萬。

據新加坡《聯合早報》，香港警務處助理處長（公共關係）陳思達話，喺資訊爆炸嘅時代人們過目即忘，要加深大眾印象，記得騙子伎倆同避免上當好重要；佢話短片劇本由兩地警員通過視訊會議一同撰寫，取材自真實案例，定咗大綱後，由新加坡警方負責英文對白，香港警方寫中文對白。短片選角多數係警員，亦搵咗貼合事主年齡同背景嘅演員，希望增強觀眾代入感。

新加坡警察部隊公共事務局局長陳珍偉就話，同陳思達喺一次交流中傾到詐騙案，發現兩地主流騙案類型相似，於是一拍即合，揀咗4類影響深遠同損失金額較多嘅騙案做題材拍片，包括假朋友來電、網絡愛情、演唱會門票同埋假冒官員騙案，希望提高民眾警覺。